29 чэрвеня на пасяджэнні Кансультатыўнага савета пры Нацыянальным цэнтры абароны персанальных даных абмеркавалі праект закона “Аб змяненні законаў па пытаннях абароны персанальных даных”.
Кансультатыўны савет – дарадчы орган на грамадскай аснове, у яго ўваходзяць прадстаўнікі дзяржорганаў, бізнес-супольнасці, юрысты і эксперты ў сферы прыватнасці. Адна з яго задач – фарміраваць рэкамендацыі па ўдасканаленні профільнага заканадаўства.
Як паведаміла намеснік дырэктара Цэнтра Іна Леус, законапраект падрыхтаваны ў рамках плана падрыхтоўкі праектаў заканадаўчых актаў на 2026 год, з мэтай актуалізацыі і ўдасканалення Закона № 99-З “Аб абароне персанальных даных” ад 7 мая 2021 года і прывядзення іншых законаў у адпаведнасць з яго нормамі. Дакумент плануюць унесці на разгляд ва Урад у жніўні.
Па словах начальніка ўпраўлення метадалогіі абароны персанальных даных Цэнтра Ірыны Пырко, змены рыхтуюць планава, без радыкальнай змены падыходаў – з улікам правапрымяняльнай практыкі, якая склалася.
Сярод ключавых мэт паправак:
- знізіць адміністрацыйную нагрузку на арганізацыі пры апрацоўцы персанальных даных;
- узмацніць абарону гэтых грамадзян пры выкарыстанні сучасных тэхналогій (відэаназіранне, аўдыёзапіс, аўтаматызаваная апрацоўка);
- замацаваць на заканадаўчым узроўні практыку прымянення норм Закона № 99-З;
- пашырыць паўнамоцтвы Цэнтра – у тым ліку ў нарматворчасці, прававой асвеце і ўзаемадзеянні з прафесійнай супольнасцю.
Ірына Пырко падкрэсліла, што Закон “Аб абароне персанальных даных” павінен забяспечваць баланс паміж развіццём тэхналогій і абаронай інтарэсаў грамадства і асобнага чалавека.
Праца Кансультатыўнага савета па выпрацоўцы прапановаў, накіраваных на абарону персанальных даных беларускіх грамадзян, працягнецца.
'